İsmayıllıda şəhidin xatirəsinə həsr olunmuş kitabın təqdimatı keçirilib
Bu gün 44 günlük Vətən Müharibəsi şəhidi gizir Ramil Musayevin xatirəsinə həsr edilmiş “Qəhrəmanın şəhadəti” adlı kitabın təqdimat mərasimi keçirilib.
Şəhidin təhsil aldığı N. Behdiyev adına 6 saylı tam orta məktəbdə keçirilən təqdimat mərasimində RİH başçısı Nahid Bağırov, RİH-nin əməkdaşları, YAP İsmayıllı rayon təşkilatının sədri, şəhid ailələri, qazilər, ictimaiyyət nümayəndələri, şəhidin ailə üzvləri, şəhidin sinif və kursant yoldaşları iştirak edib.
Tədbirdə Azərbaycan Respublikasının Dövlət himni səsləndirilib, şəhidlərin əziz xatirəsi bir dəqiqəlik sükutla yad edilib.
Tədbiri giriş sözü ilə RİH başçısı Nahid Bağırov açaraq vətənin müdafiəsi uğrunda canından keçən Ramil Musayevin və digər şəhidlərimizin əziz xatirəsinin xalqımız tərəfindən daim dərin ehtiramla yad edildiyini, onların qanlarının yerdə qalmadığını bildirərək bütün şəhidlərimizə rəhmət və qazilərimizə şəfa diləyib, kitabın ərsəyə gəlməsində əziyyəti olan şəxslərə öz minnətdarlığını bildirib.
Ailə üzvləri çıxış edərək şəhid gizir Ramil Musayevin keçdiyi qəhrəmanlıq yolu, həyatı haqqında xatirələrini tədbir iştirakçıları ilə bölüşüblər.
Kitabın müəllifləri tədbir iştirakçılarını kitab haqqında məlumatlandırıblar. Qeyd edilib ki, “Qəhrəmanın şəhadəti” adlı kitabda şəhid, gizir Ramil Musayevin həyatı və döyüş yolundan bəhs edilir, ailə üzvlərinin, döyüş yoldaşlarının xatirələri yer alır.
Digər çıxış edənlər şəhidlərin xatirəsinə yazılmış kitabların gənclər üçün vətənpərvərlik nümunəsi olduğunu qeyd edərək, kitabı ərsəyə gətirənlərə minnətdarlıq ifadə ediblər.
Qeyd edək ki, Musayev Ramil Aydın oğlu 1991-ci ildə İsmayıllı rayonu Aşağıbaş kəndində anadan olub. R. Musayev Vətən müharibəsində xüsusi Təyinatlı dəstənin giziri olaraq döyüş tapşırıqlarını yerinə yetirib, 03 oktyabr 2020-ci il tarixdə Cəbrayıl rayonunun azad olunması istiqamətində gedən döyüşlərdə qəhrəmancasına şəhid olub. Şəhid Ramil Musayev doğulduğu İsmayıllı şəhərində torpağa tapşırılıb. Ali Baş Komandan İlham Əliyevin müvafiq sərəncamları ilə Ramil Musayev ölümündən sonra “Qarabağ” ordeni, “Vətən uğrunda”, “ Fizulinin azad olunmasına” və “Cəbrayılın azad olunmasına görə” medalları ilə təltif edilib.
Tədbirdə şagirdlər hərbi vətənpərvərlik mövzusunda şeirlər səsləndirilib.
Ruhun şad olsun!
Subyekt.az
