Qaradağ rayonu, 5 iyun – Su Təsərrüfatı və Meliorasiya İşçiləri Günü münasibətilə su təsərrüfatı və meliorasiya sahəsində uzunmüddətli, səmərəli və nümunəvi fəaliyyəti ilə fərqlənən Sultan Əmiraslanov Qaradağ Rayon İcra Hakimiyyəti tərəfindən fəxri fərmanla təltif edilib.
Təltif Qaradağ Rayon İcra Hakimiyyəti başçısının 4 iyun 2026-cı il tarixli 81 nömrəli sərəncamına əsasən həyata keçirilib. Fəxri fərman Sultan Əmiraslanovun peşə fəaliyyətində göstərdiyi yüksək məsuliyyət, işinə sədaqəti, su təsərrüfatı və meliorasiya sisteminin inkişafına verdiyi töhfələr, eləcə də sahədə əldə etdiyi uğurlu nəticələr nəzərə alınaraq təqdim olunub.
Su təsərrüfatı və meliorasiya sektoru ölkənin sosial-iqtisadi inkişafında mühüm strateji əhəmiyyət daşıyan sahələrdən biri hesab olunur. Bu istiqamətdə çalışan mütəxəssislərin fəaliyyəti su ehtiyatlarının səmərəli idarə olunması, kənd təsərrüfatının dayanıqlı inkişafı, torpaqların münbitliyinin qorunması və ərzaq təhlükəsizliyinin təmin edilməsi baxımından xüsusi önəm kəsb edir.
Qaradağ Rayon İcra Hakimiyyəti tərəfindən təqdim olunan bu təltif Sultan Əmiraslanovun peşəkar fəaliyyətinə verilən yüksək qiymətin göstəricisi olmaqla yanaşı, sahədə çalışan digər əməkdaşlar üçün də təşviqedici əhəmiyyət daşıyır.
Fəxri fərman Qaradağ Rayon İcra Hakimiyyəti başçısının səlahiyyətlərini icra edən, başçının birinci müavini Emil Abbasov tərəfindən imzalanıb.
Qeyd edək ki, hər il Su Təsərrüfatı və Meliorasiya İşçiləri Günü münasibətilə bu sahədə fərqlənən əməkdaşların mükafatlandırılması onların əməyinə verilən dəyərin ifadəsi olmaqla yanaşı, ölkədə su təsərrüfatı və meliorasiya sisteminin daha da inkişaf etdirilməsi istiqamətində mühüm motivasiya amili kimi çıxış edir.
Subyekt.az kollektivi Sultan Əmiraslanovu bu fəxri təltif münasibətilə səmimi-qəlbdən təbrik edir, ona möhkəm cansağlığı, məsuliyyətli fəaliyyətində davamlı uğurlar və yeni nailiyyətlər arzulayır.
Subyekt.az
