Onilliklər keçsə də, minlərlə azərbaycanlı ailə üçün gözlənti hələ də bitməyib.
Keçmiş Ermənistan-Azərbaycan münaqişəsi nəticəsində 4 010 Azərbaycan vətəndaşı bu günədək itkin düşmüş şəxs kimi qeydiyyatdadır. Onların ailələri üçün bu, keçmişdə qalmış statistika deyil. Bu, hər gün cavab gözləyən bir sualdır.
İtkin düşmüş şəxslərin taleyinin müəyyən edilməsi məsələsi Azərbaycan Respublikasının Prezidenti İlham Əliyevin daim diqqət mərkəzindədir və bu istiqamətdə görülən işlər dövlət və humanitar məsuliyyət kimi ardıcıl şəkildə davam etdirilir.
Yoxlanılan hər bir şahid ifadəsi, araşdırılan hər bir ehtimal olunan dəfn yeri, aşkarlanan hər bir insan qalığı və əldə olunan hər bir DNT uyğunluğu daha bir ailəni həqiqətə yaxınlaşdırır. Bu günədək 32 kütləvi məzarlıq aşkar edilib, 328 itkin düşmüş şəxsin kimliyi DNT analizi vasitəsilə müəyyən olunub.
Bu işlərin böyük hissəsi ictimaiyyətin gözündən uzaqda, bəzən çətin dağlıq ərazilərdə, sürətlə dəyişən hava şəraitində, mina və partlamamış sursat təhlükəsi altında aparılır.
Lakin qarşıya çıxan bütün çətinliklərə baxmayaraq, axtarışlar qətiyyətlə davam etdirilir.
İtkinlərin ailələri onilliklərdir gözləyir. Onların doğmalarının başına nə gəldiyini bilmək, qalıqlarını geri almaq və onları layiqincə torpağa tapşırmaq hüququ var.
Azərbaycan bütün mövcud imkanlardan və müasir texnologiyalardan istifadə etməklə axtarışları nə qədər tələb olunursa, bir o qədər davam etdirəcək.
İllər keçə bilər. Məsuliyyətimiz dəyişmir.
Mümkün olan bütün talelər aydınlaşdırılanadək axtarışlar davam edəcək.
Subyekt.az
