Bu gün qəhrəman şəhidimiz Yalçın Mustafayevin şəhadətə ucalmasından 30 il keçir. Unutmaqdıq! Unutmayacağıq!
Mustafayev Yalçın Əkbər oğlu. 31 may 1975-ci ildə Kəlbəcər rayonunun Ağcakənd kəndində anadan olub. Orta məktəbi bitirdikdən sonra 1994-cü ilin yanvarında könüllü olaraq milli ordu sıralarına yazılıb və tankçı olub. İlk döyüşü doğma Kəlbəcərinin azad olunması üçün Murovdağı istiqamətində olub. Bir müddət sonra tankçı olduğu üçün ağır döyüşlərin getdiyi Ağdam rayonunun Tərtər rayonuna yaxın ərazisinə göndərilib. Düşmənin ən güclü və aktiv olduğu bu bölgədə Yalçın Mustafayev düşmənlə ən yaxın məsafədə döyüşlərə girib. Tankı ilə dəfələrlə düşmənin güclü nöqtələrini darmadağın edib, itkilərə məruz qoyub. Yalçın Mustafayev qısa müddətdə bütün döyüşçülər arasında hörmət və cəsur döyüşçü kimi ad san qazanıb. Döyüş yolunu Tərtər rayonunda davam etdirib. 1994-cü ilin mayın 4-də erməni silahlı birləşmələri Çaylı kəndi ərazisində Yalçının əsgər yoldaşlarının bir qrupunu mühasirəyə alıb. Yalçın Mustafayev tankla həmin əraziyə girib atəş altında döyüşçü yoldaşlarının bir hissəsini mühasirədən çıxarıb. Qalan əsgərləri xilas etmək üçün ikinci dəfə geri qayıdıb mühasirəni yarmaq istəyərkən düşmənin son dərəcə güclü müqaviməti ilə üz-üzə qalıb. Sonuncu gülləyə qədər düşmənlə döyüşən qəhrəman əsgər Yalçın Mustafayev başından güllə yarası alıb. Köməyə gələn Azərbaycan əsgərləri onu atəş altından çətinliklə ağır yaralı halda çıxara biliblər. Döyüş bölgəsindən xüsusi vertolyotla Bakıya gətirilən Yalçın Mustafayev 5 gün hospitalda yaralı vəziyyətdə qalıb, lakin həkimlərin bütün səylərinə baxmayaraq onun həyatını xilas etmək mümkün olmayıb. 1994-cü il mayın 9-da Yalçın Mustafayev əbədi yaşarlığa-şəhidlik zirvəsinə ucalıb. Məzarı Bərdə şəhərindəki Şəhidlər Xiyabanındadır.
Yalçının ruhu 4 ilə yaxındır şübhəsiz şaddır. Azadlığı üçün canını qurban verdiyi torpaqlarımız artıq düşmən tapdağında deyl, azaddır.
Etibar Seyidağa
Subyekt.az
