Azərbaycanın böyük ictimai xadimi, görkəmli şairi, publisisti
Sabir Rüstəmxanlının 80 illik yubileyinə
Bu gün Azərbaycan ədəbiyyatının, ictimai-siyasi fikir tarixinin və milli düşüncə məktəbinin parlaq simalarından biri, böyük şair, publisist, sabiq millət vəkili və ziyalı Sabir Rüstəmxanlı özünün 80 illik şərəfli ömür yolunu qeyd edir. Bu, sadəcə yubiley deyil — bütöv bir həyat fəlsəfəsinin, vətən sevgisinin, milli ruhun və sözə sədaqətin təntənəsidir.
Ömür yolunun bu uca zirvəsinə çatmaq hər kəsə nəsib olmur. İnsan ömrünün həqiqi böyüklüyü yaşanan illərin sayında deyil, xalqın qəlbində qoyduğu izdə, millətinə xidmətində və zamanın sınağından çıxan əməllərində ölçülür. Sabir Rüstəmxanlı isə məhz belə şəxsiyyətlərdəndir. O, yaradıcılığı, ictimai fəaliyyəti və vətəndaş mövqeyi ilə Azərbaycan xalqının yaddaşında silinməz iz qoymuş böyük fikir adamıdır.
Bu yubileyin ən ali mükafatı xalq sevgisidir. Çünki xalqın sevgisi heç zaman təsadüfi yaranmır; o sevgi ömür boyu qazanılır, zəhmətlə, sədaqətlə və milli amala bağlılıqla əldə edilir. Cənab Prezident tərəfindən təqdim olunan “Şöhrət” ordeni də bu böyük xidmətlərin dövlət səviyyəsində verilən yüksək qiymətidir. Bu təltif yalnız bir şəxsə deyil, bütövlükdə Azərbaycan sözünə, milli ruhuna və vətəndaş mövqeyinə verilən dəyərin təcəssümüdür.
Sabir Rüstəmxanlının qələmi hər zaman vətən sevgisinin, milli kimliyin, azadlıq düşüncəsinin carçısı olub. Onun poeziyasında Azərbaycan torpağının nəfəsi, xalqın ağrısı, milli yaddaşın səsi yaşayır. O, sözün qüdrətini yalnız ədəbi yaradıcılıqda deyil, həm də vətəndaş mövqeyində nümayiş etdirən nadir ziyalılardandır. Onun keçdiyi həyat yolu əsil vətəndaşlıq məktəbidir.
Bu gün ünvanına söylənilən təbriklər, xoş sözlər və diləklər formal yubiley nitqləri deyil. Bunlar xalqın qəlbindən süzülüb gələn, sevgidən doğulan ən doğma və səmimi kəlmələrdir. Çünki Sabir Rüstəmxanlı xalqına yalnız şeirləri ilə deyil, bütöv ömrü ilə xidmət edib. Vətənə layiqli vətəndaş olmağı bacaran insana deyilən hər xoş söz, hər dua ana südü kimi halal və müqəddəsdir.
Onun “Yol bitəndə” şeiri də əslində insan ömrünün fəlsəfəsini, mənəvi hesabatını və Tanrı qarşısındakı cavabdehliyini ifadə edən dərin məna daşıyır:
“Nə yaxşı ki, torpaq bizi udanda
Ruhumuzu göy çəkəcək özünə!”
Bu misralar böyük şairin ruh dünyasının, həyat və insan haqqında düşüncələrinin poetik zirvəsidir.
Bu gün 80 yaşını qeyd edən Sabir Rüstəmxanlıya möhkəm can sağlığı, uzun ömür, yeni yaradıcılıq uğurları arzulayırıq. Azərbaycan xalqının milli yaddaşında və ədəbiyyat tarixində onun adı daim böyük ehtiramla yaşayacaq.
Sabir Rüstəmxanlıya ən böyük arzum isə budur:
Qələmi daim yazsın, sözü daim yaşasın, xalq sevgisi isə hər zaman onun yoluna işıq tutsun.
Rövşən Hüseynli
Subyekt.az
