Almaniyada fəaliyyət göstərən professor Dr. Hüseyn İncə ürək cərrahiyyəsində mühüm dönüş nöqtəsi hesab edilən innovativ əməliyyata imza atıb. O, ürəyin trikuspid qapağını ənənəvi açıq cərrahiyyə üsullarından fərqli olaraq, sinə boşluğunu açmadan – cəmi bir qan damarından daxil olmaqla uğurla dəyişdirib.
Tibb sahəsində nadir hallarda rast gəlinən bu prosedur minimal invaziv texnologiyaların imkanlarını bir daha nümayiş etdirir. Əməliyyat zamanı skalpel istifadəsinə, geniş cərrahi kəsiklərə və iri tikişlərə ehtiyac duyulmayıb. Bu isə xəstənin sağalma müddətinin əhəmiyyətli dərəcədə qısalmasına, həmçinin əməliyyat sonrası risklərin azalmasına şərait yaradır.
Mütəxəssislərin fikrincə, bu metod xüsusilə yüksək riskli ürək xəstələri üçün yeni ümid qapısı açır. Ənənəvi üsullarla müqayisədə daha az travmatik olan bu yanaşma gələcəkdə ürək cərrahiyyəsində standart prosedurlardan birinə çevrilə bilər.
Professor Dr. Hüseyn İncənin rəhbərliyi ilə həyata keçirilən bu uğur, həm Almaniyada, həm də beynəlxalq tibb ictimaiyyətində böyük maraqla qarşılanıb. Yeni texnologiyanın geniş tətbiqi üçün əlavə klinik tədqiqatların aparılması planlaşdırılır.
Mütəxəssislər hesab edir ki, bu cür yeniliklər ürək-damar cərrahiyyəsinin gələcəyini formalaşdırmaqla yanaşı, xəstələr üçün daha təhlükəsiz və komfortlu müalicə imkanları yaradacaq.
Subyekt.az
