İran şahzadəsi Rza Pəhləvi İran xalqına müraciət edərək ölkədə baş verən son etirazları “tarixi dönüş nöqtəsi” adlandırıb. O bildirib ki, üç gecə ard-arda davam edən kütləvi aksiyalardan sonra Ali Xameneinin rəhbərlik etdiyi rejim ciddi böhran mərhələsinə daxil olub.
Pəhləvinin sözlərinə görə, ona daxil olan etibarlı məlumatlar İslam Respublikasının təhlükəsizlik mexanizmlərinin zəiflədiyini göstərir. Bildirilir ki, rejim ciddi şəkildə muzdlu qüvvə çatışmazlığı yaşayır, bir çox silahlı və təhlükəsizlik əməkdaşı mövqelərini tərk edib və ya verilən əmrlərə tabe olmaqdan imtina edib. Hazırda rejimi qoruyan qüvvələrin böyük hissəsinin qeyri-iranlı, azsaylı və zorakılığa meyilli dəstələrdən ibarət olduğu qeyd olunur.
“Bu vəziyyət güc deyil, çöküşdür,” – deyə Rza Pəhləvi vurğulayıb.
O, iranlıları etirazları davam etdirməyə, küçələrdə birgə hərəkət etməyə, ailə üzvləri və dostlarla birlikdə olmağa, təhlükəsizlik məqsədilə dar küçələrdən uzaq durmağa və bir-birini qorumağa çağırıb.
Rza Pəhləvi çıxışında iranlıların tək olmadığını da bildirib. Onun sözlərinə görə, dünya üzrə İran diasporu fəallaşıb, beynəlxalq ictimaiyyət prosesləri diqqətlə izləyir. O, həmçinin ABŞ-ın prezidenti Donald Trampın İran xalqının mübarizəsini yaxından izlədiyini və dəstək verməyə hazır olduğunu bəyan etdiyini qeyd edib.
“İnsanlar küçələri tərk etməməlidir. Qəlbim İran xalqı ilədir və tezliklə onların yanında olacağıma inanıram,” – deyə Pəhləvi müraciətində bildirib.
Müraciətdə vurğulanır ki, hazırkı proseslər artıq sadəcə etiraz xarakteri daşımır və ölkədə milli inqilab mərhələsinə keçid kimi dəyərləndirilir. Pəhləvinin fikrincə, uzun illərdən sonra ilk dəfə olaraq İran rejimi bu reallığın fərqindədir.
#İran #Pəhləvi #Dünya #Gündəm
Subyekt.az
