Bu gün Qəbələdə — qədim Qafqaz Albaniyasının paytaxtında, Tarixi Azərbaycan torpağında möhtəşəm bir görüş keçirilir. Bu tədbir sadəcə bir toplantı və ya diplomatik görüş deyil; bu, Türk dünyasının ortaq dəyərlərini, qardaşlıq ruhunu, birliyə və gələcəyə inamını simvolizə edən tarixi bir hadisədir.
Qədim Qəbələ bu gün bir başqa cür gözəldir. Şəhər sanki öz tarixi ruhunu yenidən oyadıb, bayram əhval-ruhiyyəsinə bürünüb. Bu torpaq əsrlər boyu mədəniyyətlərin, sivilizasiyaların qovuşduğu bir məkan olub. İndi isə buradan bütün Türk dünyasına güclü bir mesaj səslənir – “Birlikdə güclüyük, birlikdə Turana doğru!”
Türk dövlətləri arasındakı strateji tərəfdaşlıq və qardaşlıq münasibətləri yeni mərhələyə qədəm qoyur. Bu gün Qəbələdən ucalan səs — Türk birliyinin, iqtisadi, siyasi və mədəni inteqrasiyanın daha da dərinləşməsi yolunda atılan əzmli addımın təntənəsidir.
Bu möhtəşəm prosesin mərkəzində, şübhəsiz ki, Azərbaycan Respublikasının Prezidenti cənab İlham Əliyevin uzaqgörən siyasəti dayanır. Onun rəhbərliyi ilə Azərbaycan yalnız regionda deyil, həm də bütün Türk dünyasında birliyin, həmrəyliyin və gücün simvoluna çevrilib.
Prezident İlham Əliyevin həyata keçirdiyi siyasət Türk dünyasının vahid məqsədlər uğrunda birləşməsinə, Turan idealının reallığa çevrilməsinə doğru atılmış mühüm addımdır. Qəbələdə keçirilən bu görüş isə həmin siyasətin bariz təcəssümüdür — tarixlə gələcəyin, milli kimliklə müasir inkişafın vəhdət nöqtəsidir.
Bu gün Qəbələdən bütün Türk ellərinə ucalan səs, yeni dövrün, yeni nizamın içərisində Türk dünyasının söz sahibi olmasının ən canlı sübutudur.
Rövşən Hüseynli
Subyekt.az
