Azərbaycanın xarici siyasətində qonşu ölkələrlə münasibətlərin inkişafı prioritet istiqamətlərdən biri olaraq qalır. Bu baxımdan İlham Əliyevin 2026-cı il aprelin 6-da Gürcüstana etdiyi səfər və mətbuata verdiyi bəyanat regionda əməkdaşlıq və sabitliyin gələcək perspektivləri baxımından mühüm əhəmiyyət kəsb edir. Millət vəkili, Milli Məclisin İctimai birliklər və dini qurumlar komitəsinin sədri Fazil Mustafa bu səfərin siyasi və geostrateji əhəmiyyətini şərh edir.
– Fazil müəllim, Prezident İlham Əliyevin 2026-cı il aprelin 6-da Gürcüstana səfəri zamanı mətbuata verdiyi bəyanatı necə dəyərləndirirsiniz?
– Prezidentin həmin səfər çərçivəsində verdiyi bəyanat göstərdi ki, Azərbaycan regionda sabitlik, əməkdaşlıq və qarşılıqlı faydalı tərəfdaşlıq prinsipinə sadiqdir. Gürcüstanla münasibətlərimiz strateji xarakter daşıyır və bu əlaqələr yalnız iki ölkənin deyil, bütövlükdə Cənubi Qafqazın inkişafı baxımından mühüm əhəmiyyət kəsb edir. Dövlət başçısının çıxışında vurğulanan əsas istiqamətlər – iqtisadi əməkdaşlıq, enerji təhlükəsizliyi və nəqliyyat layihələri – regionun gələcək inkişaf trayektoriyasını müəyyənləşdirir.
– Bu bəyanatda xüsusilə hansı məqamlar diqqətinizi çəkdi?
– Ən diqqətçəkən məqamlardan biri Azərbaycan ilə Gürcüstan arasında formalaşmış etibarlı tərəfdaşlıq mühitinin xüsusi vurğulanması idi. Bu, artıq sadəcə diplomatik münasibətlər deyil, konkret layihələr üzərində qurulmuş praktik əməkdaşlıqdır. Enerji dəhlizləri, nəqliyyat xətləri və regional təşəbbüslər Azərbaycanın təşəbbüskar rolunu aydın şəkildə ortaya qoyur. Eyni zamanda, Prezidentin çıxışında qarşılıqlı hörmət və daxili işlərə qarışmamaq prinsiplərinin önə çəkilməsi beynəlxalq münasibətlər baxımından mühüm mesajdır.
– Sizcə, bu səfər və bəyanat regionda siyasi balansı necə təsir edə bilər?
– Bu səfər regional əməkdaşlıq mühitinin daha da möhkəmlənməsinə xidmət edir. Azərbaycan artıq etibarlı tərəfdaş kimi mövqeyini təsdiqləyib və bu mövqe təkcə iqtisadi deyil, siyasi sabitlik baxımından da əhəmiyyətlidir. Gürcüstanla münasibətlərin güclənməsi yeni risklərin qarşısını alan, eyni zamanda əlavə imkanlar yaradan amildir. Bu, həm də göstərir ki, regional problemlərin həlli üçün məhz region ölkələrinin təşəbbüsü və qarşılıqlı əməkdaşlığı əsas rol oynamalıdır.
– Azərbaycanın beynəlxalq nüfuzu baxımından bu cür səfərlərin əhəmiyyətini necə qiymətləndirirsiniz?
– Bu cür səfərlər Azərbaycanın beynəlxalq nüfuzunu daha da möhkəmləndirir. Prezidentin səsləndirdiyi fikirlər ölkəmizin prinsipial və ardıcıl siyasət apardığını nümayiş etdirir. Bu gün Azərbaycan yalnız regionda deyil, daha geniş coğrafiyada etibarlı tərəfdaş kimi qəbul olunur. Gürcüstanla münasibətlər isə bu siyasətin ən uğurlu nümunələrindən biridir.
– Sonda əlavə etmək istədiyiniz məqam varmı?
– Qeyd etmək istərdim ki, Azərbaycanın həyata keçirdiyi siyasət uzunmüddətli strateji baxışa əsaslanır. Bu baxışda qonşu ölkələrlə sağlam və qarşılıqlı faydalı münasibətlər xüsusi yer tutur. Prezidentin Gürcüstana səfəri və verdiyi bəyanat da bu siyasətin ardıcıl və məqsədyönlü xarakter daşıdığını bir daha nümayiş etdirir.
Subyekt.az
