İranın əfsanəvi müğənnisi və aktrisası Ququş (əsl adı Faiqə Atəşin) Amerika Birləşmiş Ştatlarının Prezidenti Donald J. Trampa açıq məktubla müraciət edib. Subyekt.az xəbər verir ki, o, məktubunda İran İslam Respublikası rejiminin iranlılara qarşı törətdiyi zorakılıqlara diqqət çəkərək ABŞ rəhbərliyini İran xalqı ilə həmrəy olmağa çağırır.
Amerika Birləşmiş Ştatlarının Prezidenti
Hörmətli Donald J. Trampa
Ağ Ev
1600 Pennsylvania Avenue NW
Vaşinqton, DC 20500
Hörmətli cənab Prezident,
Mən Sizə bir vaxtlar İslam Respublikasına görə səsini itirmiş iranlı bir sənətçi kimi yazıram. Bu gün isə, cənab Prezident, verdiyiniz vədə əməl etməyiniz üçün Sizə yalvarıram.
İran xalqı İslam Respublikası rejimi tərəfindən qətlə yetirilir. Etibarlı hesablamalara görə, cəmi bir neçə gün ərzində on iki min ilə iyirmi min arasında insanın həyatı əlindən alınıb. Sizi İran xalqının yanında durmağa, Şahzadə Rza Pəhləvi ilə əməkdaşlıq etməyə və təcili, qətiyyətli addımlar atmağa hörmətlə çağırıram.
Qırx yeddi il ərzində bu rejim rifah əvəzinə müharibəni, həyat əvəzinə ideologiyanı seçib. Xəstəxanalar dağılarkən “Amerikaya ölüm” şüarları səsləndirildi. Məktəblər tikmək əvəzinə amerikalıları girov götürdü. İranın çayları quruyub, iqtisadiyyatı çökərkən “İsrailə ölüm” deyə bağırdı. Milyardlarla vəsait raketlərə, Hizbullaha və xarici proksilərə xərcləndi, iranlılar isə yoxsulluq, elektrik kəsintiləri, su çatışmazlığı, senzura, həbslər və kütləvi mühacirətlə üzləşdi.
Bu gün İran daxilində müdafiəsiz insanlar Sizə səslənir, insanlığa qarşı davam edən bu cinayətlərlə üz-üzə qalarkən yardım istəyirlər.
Cənab Prezident, ümid edirəm ki, xalqıma kömək edəcəksiniz və son beş onillikdə İran xalqı ilə qətiyyətlə həmrəy olan ilk Amerika Birləşmiş Ştatları lideri olacaqsınız. Bununla da bir zamanlar iki ölkə arasında mövcud olmuş tarixi münasibətlərin yenilənməsinə töhfə verəcəksiniz.
İranın azadlığına və onun cəsur gənclərinin qələbəsinə ümidlə,
Hörmətlə,
Googoosh
Subyekt.az
