Azərbaycan Quş Əti, Yumurta İstehsalçıları və İxracatçıları Assosiasiyasının rəhbəri Mürvət Həsənli bəzi dövlət qurumlarının yaratdığı süni problemlərdən cana doyduğunu yazdı, kömək istədi.
Subyekt.az iş adamının mediaya və ictimaiyyətə müraciətini təqdim edir:
“Səbrin də bir həddi var. Nə qədər olar?!”
And olsun Allaha, sahibkar artıq öz işi ilə məşğul ola bilmir. Həftənin ən azı dörd gününü ayrı-ayrı dövlət qurumlarının yaratdığı əsassız problemləri həll etməyə sərf edir. Sahibkar istehsalı artırmağı, yeni iş yerləri yaratmağı, investisiya qoymağı düşünməli olduğu halda, vaxtını və enerjisini süni maneələrin aradan qaldırılmasına sərf edir.
Cənab Prezident dəfələrlə açıq şəkildə bildirib ki, sahibkarı, fermeri incitmək olmaz, onların fəaliyyətinə maneələr yaradılmamalıdır. Bəs bu tapşırıqları kim eşitməli və kim icra etməlidir?
Əgər hər hansı dövlət qurumu qanunsuz və əsassız şəkildə fermeri incidirsə, sahibkarın normal fəaliyyətinə mane olursa, bu, artıq yalnız bir vətəndaşa və ya sahibkara qarşı haqsızlıq deyil. Bu, ölkədə həyata keçirilən sahibkarlığın inkişafı siyasətinə və dövlət başçısının müəyyən etdiyi xəttə zidd yanaşmadır.
Sahibkar dövlətdən imtiyaz istəmir. Sahibkar sadəcə qanunun işləməsini, ədalətli münasibəti və fəaliyyətinə əsassız müdaxilə edilməməsini istəyir.
Ən vacib məsələlərdən biri də budur: bu gün sahibkara yaradılan hər bir əsassız problem sabah onun maliyyə vəziyyətinə birbaşa təsir edir. Sahibkarı heç bir əsas olmadan zərərə salmaq onun istehsal imkanlarını zəiflədir, iş yerlərini risk altına qoyur və nəticədə vergi öhdəliklərini vaxtında və tam şəkildə yerinə yetirməsində ciddi problemlər yarada bilər.
Unutmaq olmaz ki, sahibkarın zərəri yalnız sahibkarın şəxsi problemi deyil. İstehsal azalırsa, məşğulluq azalır; müəssisənin gəliri azalırsa, büdcəyə ödənilən vergilər də risk altına düşür. Yəni sahibkara yaradılan süni maneənin nəticəsi sonda iqtisadiyyata və dövlət büdcəsinə də təsir edir.
Ona görə də sahibkarın vaxtını bürokratiyaya və süni problemlərin həllinə deyil, istehsala, inkişafa, yeni iş yerlərinin yaradılmasına və ölkə iqtisadiyyatına töhfə verməyə sərf etməsinə imkan verilməlidir.
Sahibkara problem yaratmaq yox, işləməsinə şərait yaratmaq lazımdır
Mürvət Həsənlinin səsləndirdiyi fikirlər sahibkarlıq mühitində mövcud problemlərin yenidən gündəmə gətirilməsi baxımından diqqət çəkir.
Əgər sahibkar həftənin böyük hissəsini öz istehsal fəaliyyəti ilə deyil, dövlət qurumlarının yaratdığı problemlərin həlli ilə keçirməyə məcburdursa, burada artıq yalnız sahibkarın deyil, idarəetmə sisteminin də cavab verməli olduğu suallar yaranır.
Sahibkarlığın inkişafı yalnız yeni müəssisələrin yaradılması, investisiyaların təşviqi və iqtisadi göstəricilərin artırılması ilə ölçülmür. Əsas məsələ sahibkarın gündəlik fəaliyyət göstərdiyi mühitin necə olmasıdır.
Sahibkarın qarşısına əsassız inzibati maneələr çıxarılırsa, onun istehsal planları pozulursa, əlavə maliyyə itkisinə məruz qalırsa, bu, nəticə etibarilə yalnız bir biznes subyektinin probleminə çevrilmir.
İstehsal dayanırsa, iqtisadiyyat itirir. İş yeri bağlanırsa, cəmiyyət itirir. Vergi azalırsa, dövlət büdcəsi itirir.
Bu baxımdan, sahibkarın müraciətində səsləndirilən narazılıqların aidiyyəti qurumlar tərəfindən diqqətlə araşdırılması və konkret faktlar varsa, onlara hüquqi qiymət verilməsi vacibdir.
Dövlət qurumlarının əsas vəzifəsi sahibkarın fəaliyyətini çətinləşdirmək deyil, qanun çərçivəsində onun fəaliyyətinə nəzarəti təmin etməklə yanaşı, sağlam biznes mühitinin qorunmasına xidmət etməkdir.
Sahibkarın dövlətdən tələb etdiyi isə imtiyaz deyil.
Qanunun işləməsi, ədalətli münasibət və əsassız müdaxilələrə son qoyulmasıdır.
Məhz buna görə Mürvət Həsənlinin “Səbrin də bir həddi var. Nə qədər olar?!” sualı təkcə bir sahibkarın narazılığı kimi qəbul edilməməlidir.
Bu sual sahibkarlıq mühitinə cavabdeh olan bütün qurumlara ünvanlanan ciddi bir mesajdır.
Sahibkar işləməlidir. İstehsal etməlidir. Yeni iş yerləri yaratmalıdır. İnvestisiya qoymalıdır. Ölkə iqtisadiyyatına töhfə verməlidir.
Onun əsas vaxtı isə süni bürokratik maneələrin aradan qaldırılmasına sərf olunmamalıdır.
Sahibkara problem yaratmaq yox, işləməsinə şərait yaratmaq lazımdır.
Subyekt.az
