Hər ilin 5 oktyabrında dünyanın hər yerində bir sükut, bir minnətdarlıq, bir dərin ehtiram duyulur — Müəllimlər Günündə. Amma mən deyərdim ki, ilin bir günü yox, bütün günləri Müəllimlərin günüdür. Çünki müəllim olmaq yalnız bir peşə deyil, ömürlük bir missiyadır – işıq saçmaq, öyrətmək, formalaşdırmaq, insan yetişdirmək missiyası.
Azərbaycan müəllimi bu missiyanın ən uca zirvəsində dayanır. O, millətin yaddaşını, düşüncəsini, ruhunu daşıyan müqəddəs bir dəyərlər məbədidir. Və bu məbədin qürurla ucaldığı yerlərdən biri də Kəlbəcərdir — təbiətin gözəlliyi ilə yanaşı, ziyalılığı, mənəviyyatı ilə seçilən bir diyar.
Kəlbəcərin Təhsil Salnaməsində Qızıl Sətirlər
Kəlbəcərin təhsil tarixi elə bir səlnamədir ki, orada hər müəllimin adı bir nur kimi parlayır. Onların çoxu artıq bu dünyadan köçsə də, ruhları, yaratdıqları dəyərlər, yetişdirdikləri nəsillər hələ də yaşayır.
Bu gün o nurlu adları ehtiramla yada salmaq həm borcdur, həm də şərəf:
Cəfər Əhmədov, Qara Bəhmən, Qaçay Əsgərov, Hümmət Həsənov, Qənbər Qurbanov, Əli Kazımov, Məmməd Aslan, Şamil Əsgərov — və adlarını bu yazıda çəkə bilmədiyimiz onlarla digər şərəfli, ləyaqətli, görkəmli müəllimlər…
Onlar sadəcə dərs demirdilər, insan yetişdirirdilər. Minlərlə şagird bu dəyərli insanların yetirməsi kimi bu gün həm ölkəmizdə, həm də xaricdə Azərbaycanın adını uca tutur.
Hər biri bir məktəb, bir ocaq idi. O ocaqların istisi bu gün də Kəlbəcərin dağlarında, dərələrində, məktəblərində yaşayır.
Unudulmaz Fərhad Müəllimim – İlk Qələm Sahibim
Bu dəyərli müəllimlər içərisində bir ad mənim üçün xüsusilə əzizdir — ilk qələm tutmağı mənə öyrədən Fərhad müəllim. O, artıq haqq dünyasındadır, amma onun səsi, səmimiyyəti, öyrətdiyi hər hərf qəlbimdə yaşayır.
Bu gün onun ruhu qarşısında baş əyir, minlərlə onun kimi müəllimlərə “Ruhunuz şad olsun!” deyirəm.
Müəllimlik – Ruhun Əməyi, Zəkanın İşığıdır
Böyük Sokrat demişdi:
“Dünyada hər şeyə dəyər vermək mümkündür, lakin müəllimin əməyinə əsla dəyər verilə bilməz.”
Bu sözlər bu gün də öz aktuallığını itirməyib. Müəllimlik – maddi ölçülərlə ifadə olunmayan, ruhun, zəkanın və fədakarlığın sintezidir.
Məhz bu fədakarlığın nəticəsidir ki, 32 il sonra Böyük Qayıdış proqramı çərçivəsində Kəlbəcərdə Bəhmən Cəfərov adına 1 nömrəli məktəb yenidən fəaliyyətə başladı. Bu hadisə təkcə bir məktəbin açılışı deyil, həm də təhsilin dirçəlişi, ruhun doğuluşu, yaddaşın qayıdışı idi.
Gələcəyin Yolu Müəllimin Ayaq İzindən Keçir
Bu gün yaşayan, yaradan bütün müəllimlərə — başda dəyərli ziyalımız, gözəl pedaqoq alim Şahlar Əsgərov olmaqla — dərin minnətdarlığımı bildirirəm.
Sizlər Azərbaycanın gələcəyinin memarısınız. Sizin yetişdirdiyiniz şagirdlər, tələbələr bu xalqın sabahı, dövlətin dayağı, millətin ümididir.
Azərbaycan təhsilinin çiçəklənməsi sizdən və sizlərin yetişdirdiyi gənclərdən asılıdır.
Allah bütün müəllimlərimizi qorusun!
Ruhu ucalara qovuşanlara rəhmət, yaşayanlara isə uzun ömür, can sağlığı arzulayıram.
Qəlbimizdə həmişə yaşar Müəllimlər!
Rövşən Hüseynli
Subyekt.az
