Çeçenistan rəhbəri Ramzan Kadırovun böyük oğlu, respublikanın Baş nazirinin müavini və Bədən Tərbiyəsi və İdman naziri Əhməd Kadırova “Çeçenistan Qəhrəmanı” fəxri adı verilib.
Bu barədə Çeçenistan hökumətinin sədri Məhəmməd Daudov məlumat yayıb.
“Əziz qardaşı oğlum, Çeçenistan Respublikasının Baş nazirinin müavini və Bədən Tərbiyəsi və İdman naziri Əhməd Ramzanoviç Kadırovu ‘Noxçin Paçxalxan Konax’ — ‘Çeçenistan Qəhrəmanı’ yüksək adına layiq görülməsi münasibətilə təbrik edirəm”, – Daudov yazıb.
Onun sözlərinə görə, mükafat Əhməd Kadırovun region və onun sakinləri qarşısındakı xidmətlərinə, həmçinin idman və bədən tərbiyəsinin inkişafına verdiyi töhfəyə görə təqdim olunub.
Daudov həmçinin Əhməd Kadırovun Çeçenistanın ilk prezidenti Əhməd-Hacı Kadırovun siyasi komandasının “layiqli nümayəndəsi” olduğunu bildirib və onun “respublikanın və Vətənin rifahı naminə” çalışdığını vurğulayıb.
Əhməd Kadırov Ramzan Kadırovun övladları arasında dövlət strukturlarında yüksək vəzifə tutan şəxslərdən biridir. Onun gənc yaşda yüksək vəzifələrə və dövlət mükafatlarına layiq görülməsi Kadırov ailəsinin Çeçenistanın siyasi idarəçiliyindəki roluna dair müzakirələri yenidən gündəmə gətirib.
Subyekt.az
